Eftir margra ára lægð í vínframleiðslu vegna aðskilnaðarstefnunnar sem var í Suður Afríku, eru suður afrísk vín loksins að ná þeirri athygli og því umtali sem þau eiga skilið. Í þessari grein ætla ég að fjalla aðeins um sögu vínanna, vínsvæðin og helstu vínþrúgur þeirra.

Seint á 18 öld var framleitt í Suður Afríku eitt af frægustu og eftirsóttustu vínum í heimi, Klein Constantia, sætt vín. Vínið var svo hátt skrifað að það keppti við Sauternes vín í verði. En því miður þegar útflutningsbann var sett á Suður Afríku vegna aðskilnaðarstefnu þeirra, staðnaði vínframleiðslan verulega, ekki bara hjá Klein Constantia heldur hjá öllum vínframleiðendum. Ástæðan var einföld, flestir Suður Afríku búar drekka frekar ódýr vín, og þar sem framleiðendur gátu ekki selt vörur sínar á erlendum mörkuðum var engin ástæða til að sýna metnað eða þróa betra vín. Þegar aðskilnaðarstefnan var loks afnumin var vínframleiðslan í sumum tilvikum allt að 20 árum á eftir Evrópu og nýja heiminum í framleiðsluaðferðum og vínrækt. En menn voru ekki lengi að aðlaga sig og koma sínum vínum í samkeppnishæf gæði. Í dag er óhætt að segja að suður afrísk vín standi jafnfætis öðrum löndum í verði og gæðum, þökk sé dugnaði, og hörku vinnu hjá vínframleiðendum.